حبيبتي ..
.
.
الحلم أبيض ورا العَتمة
عم يشبك على حدود النّدي
حَبَق و خْيااااال .. مْعَتّق و مَصلوب
ما بين رَسمِك و رَسمي
و مْسَمَّر و مَخضوب ..
و بيطالب الفجر
يعجّل قناديلو
تَ يحكيلو ...
و يحديلو
أحلى ورد بْنَفسَجي
طالع من العَتمة
*
حبيبتي أنتِ الفَرَح
أنتِ كل القصص
لَمّا بتصحي ..
بيشبك الياسمين دَيّاتو
و بيرندح و قلبو منشرح
من عقيق حكاياتو
و بيحَمّل تراتيلو
على جناحات كل نَسمة
و بيتَرغل الياقوت جَنّاتو
و بينتُرْ عبير آهاتو
مْواويل مَجدولة بأمَل
و بنفحات من إيام ستِّك و ستّي
مْأصّلة متل البحر
كلمة وَرا كلمة
و عَ مواويلهن ..
بيجن مَشلَح الغنّيّة ..
و بتدبك و تصدَح لحالا
و شو بيرتحلا تغدق بعبّك
و تعَوشق النّغمة .
*
و لَمّا تنامي
أنتِ الوحيدة الما بتشعري بْكل الدّني
البتجَمّع بحورا
و كل الأراضي ..
و السّما و كل الورد ..
و نجومها بيتجَمّعو
وْ حَدُّن قمر
تا يسرقو من وجهك نتفة سحر
و من حَلاكِ شويّة حكايات
و غناني و غْناجْ و صور ..
مبتسمِة .
*
يا حلوة الحلوات
يَلّي على خدودِك جَنّو
و صارو يتسابقو الأعياد
- متل حلمي -
و بمواويلهن
ما بيخلصو الكلمات
و لا الآهات
و من حلا عيونِك
ما بتنتهي الجَنّات
و لا اللّيل بيطلق سَراحا لَلعَتمة
و ما فيّي أوصف البَسمات ..
المرسومة على شفاف الزّهر
يلّي بتضَلّا دهر
كل بَسمة أحلى و أحلى من بَسمة
*
بحبّك أنا و عشقان
وْ لا بقشَعو نَيسان
إلّا على خدودِك
على شفافِك و بحدودِك
بْحلا عيونِك
قاعد و هَيمان
و بْتعلَق الغيرة
بيني و بينو و بتغدُق الألحااان
تا تنتهي الدّني
وقتها بتتعب الكلمة
لكنها بتبقى عم تصرَخ
بحبّك أنا و وَلهان
بحبّك أنا و تعبان
أنتِ الصّلا على شفافي
أنتِ الحَلا
أنتِ الوَجَع صافي ..
و دافي
أنتِ محراب الأمل
يحميلي ياكِ
يخلّيلي عَفاكِ ..
و لُغاكِ
يا أجمل من كل تياب الورد
يا أكمَل و أبهى من حضور الوَعد ..
و السّعد
حبيبتي على لساني ..
و بحروفي
أحلى كلمة
و بقلبي و بروحي حياتي
أغلى من أغلى نعمة .
.
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.