كلام الناس
بقلم / سعيد عرفه
بَحّار فى بحر المآسي
بتحدى غمار الزيف
تايه ما بين المراسي
راكب مراكب خوف
غريق فى بحر الكلام
روحي بتأبى خسوف
يجرحني كلام ناسي
ولسانهم مش مكسوف
وأنا اللي ياما مشيت
لأجل ما أرسى لبر
عديت بحور و آهات
وقابلت مآسي وشر
دلوقتي راجع أقابلك
وأحكي ليالي الضُر
الصبر لو كان دوا
أشربه لو كان مر
رافع أيدي للسما
أبكي على حالي
وكلام الناس وسواس
يجني ولا يبالي
يقطع فى لحمي الكل
ولا يبكوا على حالي
أخواني باعوا الود
أكلوني أخوالي
وأنا اللي ياما شقيت
وضحيت بالغالي
لأجل ما أوصل ود
مقطوعة أحبالي
حقي يا ناس اشكي
وأرفع لربي الدعا
وأطلب رحمة على الأرض
من فوق سابع سما
تنزل لتشفي الروح
وتطيب الخاطر
إنسان وحلمه بسيط
والمولي عليه قادر
جرحي يلاقي دواه
ولكسري يكون جابر
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.