🌾🌾🌾🌾🌾المسافات🌾🌾🌾🌾🌾
جمعت حروف اسمج يا اصيله
ولكيت الناتج بنيه جميله
تعلك بيها كلبي من الشرايين
وبقت بفراكها روحي عليله
الاسولفله يكلي مخبل شبيك
وماصحلي صديق الاشتكيله
هيه بعيده عني والمسافات
بعيده واسعه وكلش طويله
انا بلعراق وهيه بيران
وما ادري شسوي ياوسيله
من يلم شملنا ونلتقي شلون
وصحاب الوفى كلش قليله
فرق بيناتنا مو بس مسافات
فرق العمر والقصه هزيله
هيه بعمر ورده وتزهي كل يوم
ونا وردي ذبل وتعدى حيله
التحب مثلي بعمرها وتقبل شلون
وتكول ارجوك انا عندك دخيله
المايحمي دخيله ماهو رجال
بمكان عكاله خل يلبسله شيله
وانا كل حياتي مزامط الخوف
اخوف الخوف كله ومستحيله
وانا ما اطخن راس للغير
ولا اجتمع ويا اهل الرذيله
لكن عقلي جبير وكلبي حباب
وتحبني الناس من هاي الخصيله
🌻🌻طالب الشاعر العلي🌻🌻
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.